Eriksen skal hava skurðísettan hjartastartara

Nú er greitt, at Christian Eriksen hevur tørv á einum skurðísettum hjartastartara.

Tað kunngerð DBU á Twitter.

- Nú hjartað hjá Christiani er kannað,  er avrátt, at hann skal hava skurðísett ein hjartastartara, eitt so nevnt ICD-tól. Hatta fáa fólk, sum hava fingið hjartasteðg orsakað av óregluligum hjartasláttri, sigur landsliðslæknin, Morten Boesen.

Sambært DBU, so er Christian Eriksen friðsamur við støðuna. 

- Ætlanin er løgd fram fyri bæði donskum og altjóða læknum, og allir viðmæla tað sama. Vit mæla til at geva Christiani og familju frið næstu tíðina, sigur Morten Boesen, lækni hjá danska fótbóltslandsliðnum.