Ívar Iversen farin

Ívar Iversen, fyrrverandi útvarpsmaður, er deyður, 90 ára gamal.

Ívar var útbúgvin fjarritari, men útvarpsarbeiði kom at vera lívsyrki hansara.

Ívar varð settur í starv í útvarpinum í 1960.

Hann gjørdist tíðliga ein kend útvarpsrødd, og hann las óteljandi tíðindasendingar øll 40 árini, hann var í útvarpinum.

Ívar skrivaði fyri tað mesta uttanlandstíðindi, sum hann týddi úr útlendskum málum, og tað lá raðið fyri, tí hann dugdi føroyska málið til lítar.

Hann gekk undan at evna eitt gott, føroyskt tíðindamál í útvarpinum.

Ívar hevði tokka til tónleik og sang, og hann gjørdi eisini tónleikasendingar, serliga við klassiskum tónleiki. 

Hann spældi urgu við ymisk høvi, m.a. á ellis- og røktarheimum í Havn, og eitt skifti var kann fastur urguleikari í kirkjuni í heimbygdini, Kvívík.

Eitt stutt skifti var hann útvarpsstjóri, eftir at Niels Juel Arge hevði lagt frá sær.

Ívar Iversen gavst í útvarpinum fyri aldur í árinum 2000. Tá hevði hann starvast í útvarpinum í 40 ár. 

Ívar Iversen (1998)

Ívar við mikrofonina. Hann var útvarpsmaður í 40 ár og las óteljandi tíðindasendingar.

Ívar Iversen

Ívar á tíðindavakt. Hann týddi m.a. uttanlandstíðindi úr útlendskum málum, og tað lá raðið fyri. Hann gekk undan at evna eitt gott, føroyskt tíðindamál í útvarpinum.