Nógv asfaltarbeiði í fjør

Asfaltið hjá landinum er aftur í frágreiðingini hjá Landsgrannskoðanini um frávik millum játtan og nýtslu í 2020.

Í desember 2019 vórðu játtaðar 7,5 milliónir krónur til asfalt- og skervvirkið hjá Landsverki.

1,2 milliónir blivu brúktar í 2019.

6,3 milliónir blivu fluttar til 2020 og brúktar tá umframt tvær milliónir, sum eru meirnýtsla.

Eingin játtan var annars í fíggjarlógini fyri 2020.

Akuttar íløgur

Landsgrannskoðanin hevur fingið at vita frá Jørgeni Niclasen, landsstýrismanni, at Landsverk sigur, at nógvar akuttar íløgur máttu gerast, so framleiðslan ikki steðgaði

Nógv virksemi var, eitt nú skuldi Eysturoyartunnilin asfalterast.

Landsverk væntar eins og undanfarin ár, at hesin peningur verður afturgoldin í rakstrinum komandi árini, so íløgan tilsamans endar í null.

Landsgrannskoðanin vísir her á, at loyvt er ikki at fíggja meirnýtslu í einari játtan við minninýtslu í einari aðrari játtan.