Vágs Kommuna brúkt 300.000 krónur uttan játtan

Vágs Kommuna hevur brúkt 300.000 krónur til eina verkætlan, uttan at pengarnir nakrantíð eru játtaðir politiskt. 

Hálvan juli boðar Vágs Kommuna frá, at Fiskaplássið á Løðhamri, miðskeiðið í bygdini, skal gerast til eitt mentanarøki.

Selmar Nielsen Arkitetar hava tá gjørt uppskot um heildarætlan fyri økið, og verður eitt skitsu-modell av ætlanini víst fram í Miðlatúni í Vági.

Uppskotið kostar 300.000 krónur, umframt mvg. Men eingin politisk samtykt liggur aftanfyri. 

Tað váttar Bjarni Johansen, borgarstjóri, tá vit spyrja hann um tað. Borgarstjórin hevur annars ongan hug at viðmerkja málið. Hann váttar tó, at hann hevur biðið SNA um at gera heildarætlanina. 

Spurdur, hvussu nógvar pengar kommunan kann brúka, uttan at avgerðin at brúka pengarnar er kjølfest við eini nevndar- ella býráðssamtykt, vil borgarstjórin ikki svara.

Sambært Bjarna Johansen kemur málið fyri í havna- og vinnunevndini fyrst í næstu viku. Og síðani skal kunnandi fundur vera um verkætlanina hálvan september.

Uppskotið um heildarætan fyri Fiskaplássið á Løðhamri lýsir fleiri ymiskar møguleikar við økinum - og kommunan skal so gera av, hvat hon ynskir við økinum. Tástani ber til at meta um, hvat arbeiðið tá avtornar fer at kosta.