Bretska sendikvinnan vitjað í Grønlandi

Bretska sendikvinnan í Danmark, Emma Hopkins, var í farnu viku á almennari vitjan í Nuuk. Har hitti hon grønlendskar politikarar og umboð fyri grønlendska vinnulívið og granskingarumhvørvið.

- Hetta er fyrst og fremst ein vitjan, sum skal vísa okkum, hvussu okkara framtíðar samstarv við Grønland skal síggja út, og hvørji øki vit skulu leggja dent á, sigur Emma Hopkins við grønlendska kringvarpið KNR.

Millum 10 og 15 prosent av grønlendska útflutninginum fer til Bretlands. Talan er fyrst og fremst um rækjur og tosk.

Fegin um samhandilin

- Vit eru sera fegin um handilin millum okkara lond, sum serliga er grønlendskur fiskaútflutningur til Bretlands. Bretum dámar væl rækjur og eta eisini nógv fisk og kips, og tí hevur hesin útflutningurin eisini týdning fyri bretska marknaðin, sigur Emma Hopkins.

Í fíggjarlógaruppskotinum hjá grønlendsku stjórnini fyri 2022 sæst, at arbeitt verður við eini handilsavtalu við Bretland. Enn er tó ov tíðliga at siga, nær ein handilsavtala millum Grønland og Bretland verður veruleiki, sigur Emma Hopkins við KNR.