Stýrisskipanarlógin heimilar samstarvsráði

Stýrisskipanarlógin hevur heimildina hjá landsstýrinum at stovna samstarvsráðið, sum Danmark, Grønland og Føroyar stovnaðu herfyri.

Tað sigur Bárður á Steig Nielsen, løgmaður, sum hevur svarað Bjarna Kárasoni Petersen og Høgna Hoydali, tingmonnum, um uttanríkispolitiska, trygdarpolitiska og verjupolitiska samstarvsráðið í ríkisfelagsskapinum.

Hann nevnir tvær greinir í stýrisskipanarlógini, sum gevur landsstýrinum heimildina.

Løgmaður sigur, at ráðið er stovnað, tí tørvur er á sterkari samstarvi og betri samskipan, nú stórveldini vísa áhuga fyri norðuratlantshavi og Arktis.

Løgmaður og tveir landsstýrismenn í ráðnum

Fyri Føroyar eru løgmaður og landsstýrismaðurin í fíggjarmálum, hann umsitur nettrygdina, og landsstýrismaðurin í uttanríkismálum og mentamálum í samstarvsráðnum.

Ongar avgerðir um uttanríkismál, trygd ella verjumál verða tiknar í samstarvsráðnum, sigur løgmaður í svarinum. 

Samstarvsráðið er ein pallur, har sum londini kunnu kjakast um uttanríkismál, trygd og verju, eisini um málsøki, tí viðvíkjandi, sum eru yvirtikin. 

Føroyar hava formansskapin í ráðnum næsta ár.