U19-landsliðið við kvinnum vann móti Kýpros

Føroyska U19-landsliðið við kvinnu fekk eina keðiliga byrjan upp á EM-undankappingina í Hvítarusslandi, tá liðið tapti móti Makedónia í fyrsta dystinum.

So tað var umráðandi, at liðið fekk eitt gott úrslit móti Kýpros í gjár.  

Sambært heimasíðuni hjá Fótbóltsambandinum, so vístu føroysku kvinnurnar seg frá sínari allarbestu síðu, og tær vóru leikliga oman á allan fyrra hálvleik, hóast tað ikki eydnaðist at fáa nakað mál. 

U19 kvinnur, fótbóltur

Frítekst tagging: 

U19-kvinnulandsliðið

Hóast liðskiparin, Sunniva Willemoes, varð rikin av vøllinum beint fyri steðgin, fyri at hála í tiltiknu neyðbremsuna, tá kypriotar fóru í mótálop, so megnaðu føroysku kvinnurnar at vinna dystin.

"Í seinna hálvleiki vístu spælararnir hjá okkum ein framúrskarandi stríðsvilja. Tær kempaðu og runnu allan hálvleikin á tamb, og tað gav eisini úrslit," sigur Pætur S. Clementsen, venjarin, við FSF.fo. 

Málini komu í 61. og 70. minutti, og tey skutu Anitha á Dalinum og Malena Olsen.  

U19-kvinnulandsliðið hevur nú ein dyst eftir í undankappingini, og hann verður týsdagin móti vertstjóðini Hvítarusslandi.

Myndir frá dystinum hevur FSF fingið frá hvítarussiska fótbóltssambandinum.