Turkaland í búskaparligum trupulleikum

Turkaland er í stórum búskaparligum trupulleikum, tí inflatiónin er stór, samstundis sum gjaldoyrað minkar í virði.

Tað halda serfrøðingar vera orsøkina til, at Erdogan, forseti roynir at føra seg fram á altjóða pallinum, fyri á tann hátt at fáa fólk at tosa og hugsa um annað.

Inflatiónin er næstan 20 prosent, og eingi útlit eru til, at gongdin fer at venda.

Tí heitti størsta vinnufelagið í summar á forsetan, um at royna at venda gongdini í landinum. Tað er sera sjálvdan at vinnulívið leggur seg út í politikkin í Turkalandi.

Hótti við at koyra sendiharrar av landinum 

Um vikuskiftið hótti Erdogan við at tveita fleiri sendiharrar úr landinum, tí teir mæltu til at lata ein andstøðing í landinum leysan.

Hevði forsetin gjørt álvara av hóttanini, so hevði støðan í Turkalandi verið uppaftur verri, sigur Timur Kuran, við Duke universitetið við AFP-tíðindastovuna.

Andstøðingurin, Osman Kavala, hevur verið fongslaður í fleiri ár, tí hann hevur funnist at stjórnini hjá Erdogan.

Andstøðan í Turkalandi finst eisini at búskaparpolitikkinum í landinum, og andstøðan skuldsetur forsetan fyri at royna at flyta atfinningarnar frá vánaligu støðuni í landinum, til at snúgva seg um útlendsku sendiharrarnar, skrivar NTB.

Erdogan, forseti, broytti støðu í gjár, og teir 10 sendiharrarnir vera verandi í landinum.