Savnsgull

Hvat er Savnsgull?

Savnsgull er verkætlanin, sum skal bjarga tilfarinum í savninum hjá Kringvarpi Føroya. Í savninum er tilfar, sum lýsir modernaðu søgu føroyinga –  frá 1957 til í dag. Endamálið hjá Savnsgulli er at talgilda savnið og síðan at geva almenninginum atgongd til tilfarið. 

Arbeiðið er alneyðugt av tí orsøk, at kringvarpssavnið er helst størsta heimildin, vit eiga um nýggja, føroyska søgu. Í 2014 varð arbeiðið við Savnsgulli sett í gongd, tá Bjørn Kalsø, táverandi landsstýrismaður í mentamálum, trýsti á knøttin, so fyrstu ljóðupptøkurnar vórðu talgildar. Síðan tá eru 31.000 ljóðbond talgildað í kringvarpssavninum. Umframt hetta eru ein hálv millión skjøl skrásett og talgildað, eins og øll videobondini eru talgildað. Tað hevði stóran týdning, at talgildingin byrjaði tá, tí útgerðin, sum skuldi til, gjørdist, sum vera man, eldri og ringari at fáa fatur á, og serfrøðingar væntaðu, at um mann hevði bíðað, hevði tað kanska verið ógjørligt at bjargað tilfarinum í savninum. Vit kunnu tí siga, at tað var í seinastu løtu, at verkætlanin var raðfest og fekk fígging.

Fyrri partur av verkætlanini, sjálv talgildingin, var liðugur í 2023.

Atgongd til kringvarpssavnið

Seinni parturin av Savnsgull-verkætlanini inniber millum annað at gera tilfarið atkomuligt fyri almenninginum. Atgongd til savnið fer at geva Føroya fólki eitt makaleyst innlit í føroyska mentan og samtíðarsøgu seinastu 70 árini.

Yvirskipað fevnir hesin parturin av verkætlanini um tríggjar tættir: 

• at útbyggja tøkniliga undirstøðukervið, sum ger tað møguligt at arbeiða við, goyma og flyta dátur í kringvarpssavninum, so at hetta kann gerast atkomuligt
• at framleiða metadata fyri alt kringvarpssavnið, so at til ber hjá brúkarum gjøgnum leitiskipanir at leita fram viðkomandi tilfar í savninum
• at greina upphavsrættarligar spurningar og fáa í lag neyðugar avtalur um rættindaviðurskifti

Verkætlanin væntast at koma á mál um nøkur ár.

Sí eldri tilfar, ársfrágreiðingar o.a. her.