ST-umboðsmaður: Bosnia hótt av borgarakríggi

Friðaravtalan fyri Bosnia, sum í 1995 fekk enda á borgarakrígnum, er við at fara fyri bakka, um altjóða samfelagið ikki steðgar serbisku loysingarfólkunum í teirra virksemi.

Tað eru boðini frá týskaranum, Christian Schmidt, sum hann hevur latið ST.

Hann er umboðsmaður hjá ST í Bosnia, og hevur eftirlit við friðaravtaluni, sum varð sett í gildi í 1995.

Støðan er hættislig

Sambært skrivinum til ST, er Bosnia av álvara hótt av borgarakríggi, og støðan er so hættislig sum ongantíð fyrr, síðani avtalan var gjørd, skrivar hann.

"Útlitini fyri meira sundurlyndi og stríði er ógvuliga sannlíkt," skrivar Schmidt.

Sambært Reuters, skrivar hann í frágreiðingini, at bosniskir serbar virka fyri at upploysa kjarnivirksemi í landinum, sum felags her, skattamyndugleikar og felags hægstarætt.

Tað merkir í veruleikanum, at bosnisku serbarnir ikki virða tey kjarnuvirðini sum hava týdning í samfelagnum, og tað merkir í veruleikanum loysing frá restini av bosniska samfelagnum, skrivar Christian Schmidt í frágreiðingini til ST.

Trygdarráðið hjá ST fer at umrøða frágreiðingina í hesi vikuni.