Framvegis eingin semja um nýggja stjórn í Svøríki

Eingin semja er um at skipa stjórn í Svøríki. 

Tað hevur Magdalena Andersson, forkvinna í svenska Javnaðarflokkinum, boðað formanninum í ríkisdegnum frá, tí semja fekst ikki við Vinstraflokkin.

Orsøkin er kravið frá Vinstraflokkinum um, at pensjónin skal hækka, skrivar tíðindastovan TT, sum endurgevur ónevndar keldur.

Centerflokkurin atkvøður fyri

Sosialdemokratarnir sita í dag í stjórn saman við Umhvørvisflokkinum, og teir hava fingið Centerflokkin við, afturfyri at atkvøða fyri Magdalenu Andersson sum forsætisráðharra.

Men hóast svenski Javnaðarflokkurin og Vinstriflokkurin ikki kunnu semjast um at stuðla Magdalenu Andersson sum forsætisráðharra, kemur málið fyri ríkisdagin.

Tað váttar formaðurin í ríkisdegnum, Andreas Norlén, á tíðindafundi í dag.

Tí skal atkvøðast um Andersson í ríkisdegnum, og tað verður gjørt mikumorgunin.

Men í løtuni er ikki meiriluti fyri henni í ríkisdegnum.

Í Svøríki skal ríkisdagurin geva heimild til at skipa stjórn.

Má fáa stuðul frá fleiri flokkum

Skal Magdalena Andersson veljast, skal hon, um framt stuðul frá sínum egna flokki, eisini fáa stuðul frá umhvørvisflokkinum Teimum Grønu, Centerflokkinum og Vinstraflokkinum.

Expressen skrivar, at afturfyri at atkvøða fyri Magdelenu Andersson, krevur Vinstriflokkinum at fáa stuðul frá stjórnini til trý ítøkilig mál: at hækka pensjónina, betri sjúkratrygd og eina avtalu um, at flokkurin fær ávirkan í framtíðini.