Mæla til at geva lemma- og partrolarum fleiri fiskidagar

Havstovan hevur nú latið landsstýrismanninum í fiskivinnumálum tilmæli um fiskiskap eftir toski, hýsu og upsa næsta ár. 

Havstovan mælir til, at fiskidagarnir hjá lemma- og partrolarum verða øktir fimm prosent. Samstundis verður mælt til, at fiskidagarnir fyri bólk 3-5 (lína, snella og trol á landleiðini) verða skerdir fimm prosent.

Á Føroyabanka hava fleiri vinnuligar royndir verið gjørdar frá 2019 til 2021. 

Úrslitini av hesum royndum vísa, at tað er framvegis sera lítið at fáa av toski, men at tað eru stórar nøgdir av hýsu og longu á Føroyabanka. 

200 fiskidagar tilsamans á Bankanum

Fyri at gagnnýta hetta tilfeingið mælir Havstovan til at lata upp fyri avmarkaðum vinnuligum fiskiskapi á Føroyabanka. 

Mælt verður til, at høvuðsreiðskapurin á Føroyabanka framhaldandi verður lína, og at línufør fáa 200 fiskidagar tilsamans. 

Fyri at halda veiðitrýstinum á toski niðri, verður mælt til, at ávís øki á Føroyabanka verða friðað í gýtingartíðini hjá toski.

Fuglberg, Skoraberg, Fuglberg og Skoraberg, ísfiskatrolari, ísfiskatrolarar