Sámal Petur einki hoyrt frá Bárði

Tað var tollaksmessudag, at Sámal Petur í Grund, nýggjur formaður í Sjálvstýri, í Degi og Viku fríggjaði til Bárð á Steig Nilsen, løgmann.

Við útvarpið sigur Sámal Petur í Grund í dag, at hann einki hevur hoyrt frá hvørki løgmanni ella formonnunum í hinum samgonguflokkunum.

Hann sigur tó, at hann ikki hevði væntað at hoyrt nakað fyrr enn eftir fundin millum teir tríggjar floksformenninar klokkan eitt í morgin, tí at løgmaður allatíðina hevur sagt, at teir tríggir floksformenninir skulu tosa saman fyrst.

Jenis av Rana, formaður í Miðflokkinum, vil ikki gera bandaða samrøðu, men hann sigur í stuttari viðmerking í dag, at tað týdningarmesta hjá honum er at finna út av, um teir framvegis hava eina samgongu ella ikki.

Samgongan og Sjálvstýri gott samstarv

Spurdur um hann er sinnaður at taka Sjálvstýri við í eina møguliga samgongu, sigur Jenis av Rana, at samgongan alt hetta samgongutíðarskeiðið hevur havt gott samstarv við Sjálvstýri, og teir í Miðflokkinum tí einki hava ímóti um Sjálvstýri kemur við. Meira vil hann ikki siga. 

Bárður á Steig Nielsen, løgmaður, vil ikki gera nakra viðmerking til málið, fyrr enn hann hevur havt fundin við hinar floksformenninar í samgonguni.

Tað hevur ikki eydnast okkum í dag at fáa fatur í Jørgeni Niclasen, formanni í Fólkaflokkinum.