Betri rindar tryggingartakarum 40 mió. kr.

Betri fer nú at býta 40 milliónir krónur út til limirnar í Ognarfelagi Tryggingartakaranna av tí, sum felagið forvinnur. 

Tað skrivar Betri í tíðindaskrivi í morgun.

2021 hilnaðist væl, og tí er uppskot at býta 40 mió. kr. út til limirnar.

Orsøkin til, at útgjaldið er sett í mun til tryggingargjøldini til Betri Trygging er, at tryggingartakari í Betri Trygging gerst limur í Ognarfelag Tryggingartakaranna, sum eigur Betri-samtakið.

Rætturin  at fáa lut í tí, sum samtakið forvinnur, er knýttur at hesum limaskapi.

Umboðsráðið hevur avgerðina

Tað er Umboðsráðið, sum á aðalfundi endaliga ásetur, hvussu nógv verður býtt út til limirnar.

Aðalfundur felagsins verður í apríl, og eftir aðalfundin verður upphæddin, sum er sett av, goldin út.

Miðað verður eftir at býta út á hvørjum ári. 

Upphæddin er tengd at fíggjarstøðuni hjá felagnum, skrivar Betri.