Helst verður toppfundur um støðuna í Ukraina

Tað boðar franska forsetaráðið frá seinnapartin.

Putin og Macron tosaðu í dag í meir enn hálvanannan tíma umvegis telefon har Macron royndi at mýkja støðuna.

Sambært miðlinum The Guardian týðir hetta uppá, at Russland í løtuni í øllum førum, er sinnað at lata vera við at gera innrás í Ukraina, fyri at finna eina diplomatiska loysn. 

Jean Yves Le Drian, franski uttaníkisráðharrin, skal hitta russiska starvsbróðurin Sergei Lavrov ein av næstu døgunum til at fyrireika fundin á hægsta stigi millum Russland, Ukraina og møguliga onnur.

Ábendingar eru í løtuni um, at Frakland og Týskland vera við aftrat á hesum fundunum, men tað er ikki endaligt.

Enn er tó ov tíðliga at siga, um Macron hevur megnað at finna eina diplomatiska loysn, tí sambært The Guardian er enn óvist, um hansara stig í dag hevur stuðul frá USA og Bretlandi, men higartil hava flestu diplomatisku stigini sum eru tikin, verið í samráð við Hvítu Húsini.

Um toppfundurin verður, verður endamálið, at nágreina nýggjar treytir fyri frið og trygd í Evropa, upplýsir franska forsætisráðið sambært The Guardian. Eisini stendur í fráboðanini, at fundirnir skulu vera við til at fáa í lag aftur vápnahvíld, tryggja Donbas økinum í Eysturukraina, har fleiri froboðanir hava verið um at skotið verður við kanónum, og fyri at tryggja ein varandi frið í økinum.

Russiska forsætisráðið leggur aftrat, at Russland við hesum ikki tekur nøkur av sínum krøvum aftur, og legði aftur dent á, at USA og NATO mugu taka russisku trygdarkrøvini í fullum álvara, og mugu svara øllum teimum spurningum, sum Russland hevur sett teimum.