Undirtøkan hjá Putin kann minka

Tað sigur ein av ráðgevunum í Kreml sambært BBC. Andrey Kortunov er leiðari av russisku nevndini fyri altjóða viðurskifti, stytt RIAC, sum ráðgevur russisku stjórnini. 

Kortunov sigur við BBC, at hansara ráð til russisku stjórnina var, at innrásin í Ukraina ikki kundi rættvísgerast, og tí kom tað óvart á hann og fleiri onnur starvsfólk, at Russland legði á Ukraina.

Kortunov heldur tað vera sannlíkt, at innrásin í Ukraina eisini fer at kosta russiska forsetanum Vladimir Putin nakað av undirtøku í heimlandinum. Tað hava longu verið mótmæli í Russlandi, og fleiri kendir russarar hava eisini víst sína ónøgd við atgerðirnar í Ukraina.

Tað veldst um, hvussu nógv doyggja, og hvussu leingi atgerðin varar.

"Um tað bert verður eitt avmarkað tal av fólkum, sum doyggja av innrásini, verður hon roknað sum væleydnað, og so fer undirtøkan fyri Putin ikki at minka tað stóra", sigur Andrey Kortunov við BBC.

Hann sigur, at upprunaliga ætlanin hjá Putin var at atgerðin skuldi taka tvær vikur. Ger hon tað, hendir ikki so nógv við umdøminum hjá Putin í Russlandi, men um tað tekur longri tíð, kann tað enda við, at undirtøkan fyri Putin fer at minka nógv millum russiska fólkið.