ES-leiðari: Álop á sjúkrahús ein ræðulig krígsbrotsgerð

Uttanríkisovastin í ES, Josep Borell Fontelles, sigur, at álopini á eitt sjúkrahús í Mariupol í Ukraina í gjár, eru ein ræðulig krígsbrotsgerð. 

Tað sigur hann á Twitter. 

Krígsbrotsgerð

- Mariupol er undir álopi. Russisku álopini á eitt føði- og barnasjúkrahús er ein ræðulig krígsbrotsgerð. Loftálop á íbúðarøki, og russiska forðingin fyri neyðgari humaniterari hjálp skal halda uppat alt fyri eitt. Ein trygg gøta er neyðug nú, skrivar Joseph Borell Fontelles á Twitter. 

Ukrainskir myndugleikar hava funnist hvassliga at Russlandi fyri at bumba føði- og barnasjúkrahúsið í Mariupol. Sambært ukrainskum myndguleikum vóru kvinnur, børn og starvsfólk á sjúkrahúsinum, og ukranski forsetin segði í gjár, at børn og kvinnur lógu í toftunum av bumbaða sjúkrahúsinum. 

Onnur boð úr Russlandi

Men úr Russlandi eru boðini eini onnur. Har siga myndugleikarnir í dag, at sjúkrahúsið varð ikki í brúki, men var hertikið av ukrainska herinum, og tí var tað ikki eitt sivil bumbumál, men eitt hernaðarbumbumál. 

Hesum vísa ukrainskir myndugleikar aftur, og síðani russisku boðini, hevur Volodomyr Zelenskij, forseti í Ukraina sagt alment, at russar lúgva um bumbuálopið á sjúkrahúsið.