Sjey frystilínuskip undir Íslandi

Øll ísfiskalínuskipini liggja við bryggju, men væntandi fara nøkur avstað í næstum, nú veðurforsøgnin sær betur út og streymurin batnar, sum vikan gongur. 

Sjey frystilínuskip eru við Ísland og eitt undir Føroyum.

Tað sigur Fiskamarknaður Føroya í meting fyri hesa vikuna.

Roknað verður eisini við nakað av útróðri, serliga fyrst í vikuni.

Hjá partrolarunum eru seks pør til fiskiskap. Fiskiskapurin er misjavnur, og okkurt brúkiligt hál er inn ímillum. Pørini landa sum vikan gongur. Tey fáa eisini nakað av hvítum fiski.

Tvey garnaskip fiska svartkalva, og fiskiskapurin er brúkiligur. Eitt fiskar havtasku, har fiskiskapurin eisini er brúkiligur, skrivar Fiskamarknaðurin.