Ukraina: 52 fólk deyð í álopi á tokstøð

Ein høgtstandandi embætismaður í Pentagon sigur við The Guardian, at Russland sendi tvær stuttrøkkandi rakettir móti tokstøðini Krematorsk. 

Sambært ukrainskum stjórnarkeldum lótu minst 52 fólk lív og umleið 300 vórðu særd. Hetta skrivar NRK.

Úr Pentagon verður eisini sagt, at russar í løtuni byggja upp eina stóra herdeild á umleið 60.000 mans við stórbýin Kharkiv har norðureysturi í Ukraina.  

- Vit trúgva ikki russisku afturvísingunum, um at teir einki hava við rakettálopið at gera, sigur embætismaðurin í Pentagon.

Krígsbrotsverk
Ukrainski forsetin, Volodymyr Zelenskyj, segði í síni dagligu videotalu í gjárkvøldið, at russar við hesum hava framt eitt krígsbortsverk. Tí má eitt aftursvar koma frá altjóða samfelagnum.

Hann sigur, at finnast má fram til, hvør gav boðini um álopið, og afturvísir russiska páhaldinum um, at tað vóru ukrainar sjálvir, sum framdu rakettálopið. 

ST-aðalskrivarin, António Guterres, fordømir eisini álopið.

- Hetta er eitt grovt brot á fólkrættin og kann á ongan hátt góðtakast. Tann, sum stendur aftanfyri, má standa til svars, sigur talsmaðurin fyri Guterres.

Yvir 6.000 ukrainar vóru í gjár vóru fluttir burtur umvegis humaniterar farleiðir, sigur ukranski varaforsætisráðharrin, Iryna Veresjtsjuk, og í dag heldur flutningurin fram úr Mariupol og øðrum kringsettum býum í Zaporizjzja og Lukansk-økinum.

Talan er um sonevnda Donbas landslutin, sum er kent landaøki hjá bæði ukrainskum og russiskum hernaðardeildum, har russar í løtuni byggja upp stóru herdeildina. Roknað verður tí við, at talan fer at vera um sera harðar og blóðugar bardagar, skrivar NRK.