Byggja tveir fóðurflakar til Luna

JT electric á Kambsdali skal byggja tveir fóðurflakar fyri alifyritøkuna Luna.

Flakarnir skulu taka 700 tons av fóðri hvør. Teir verða latnir Luna í summar.

Seinastu árini hevur JT electric keypt og umbygt 14 skip til fóðurflakar. Men flakarnir til Luna eru fyrstu nýbygningar hjá felagnum.

Í altjóða kapping

JT electric ætlar nú at kappast við altjóða fyritøkur, sum byggja fóðurflakar.

- Hetta gevur okkum royndir við nýbygningum, so vit kunnu taka næsta stig í okkara vakstrarætlan, sum er at vera føroyskur veitari av nýbygningum til alifyritøkur á altjóða marknaðinum, sigur Suni Justinussen, stjóri á JT electric í tíðindaskrivi. 

Felagið hevur deildir í Føroyum, Danmark, Skotlandi og Póllandi. Ein fóðurflaki skal latast til Íslands í mai. 

Framkomna sjálvvirkandi fóðurskipanin, sum JT electric hevur ment, verður brúkt til at fóðra 80 milliónir laksar í Føroyum, Skotlandi, Íslandi, Noregi og Kanada.