Ungarn rindar olju og gass við rublum

Ungarn tekur undir við kravinum hjá Russlandi, og fer at rinda fyri russiskt gass og olju við rublum.

Tað váttar ungarski uttanríkisráðharrin, Peter Szijjarto, í samrøðu við CNN.

- 85 prosent av gassveitingini hjá okkum kemur úr Russlandi, og 65 prosent av oljuveitingini. Tú kanst spyrja hví? Tí tað avger undirstøðukervið. Hetta er ikki til stuttleika. Vit hava ikki valt hesa støðuna, sigur hann við CNN.

Sambært Szijjártó, verður Ungarn bundið av russiskum veitingum í fleiri ár aftrat.

Viktor Orban - Mynd: Ritzau Scanpix

Viktor Orban er forsætisráðharri í Ungarn. (Mynd: Ritzau Scanpix)

Sameindur hjá Putin 

Ungarski forsætisráðharrin, Victor Orbán, er sameindur hjá Putin, og ósemja er millum hann og ES.

Hann hitti Putin bert fáar vikur undan russisku innrásini, og Ungarn hevur funnist at tiltøkum mótí Russlandi orsakað av krígnum.

Russland krevur, at rindað verður í rublum fyri olju og gass úr Russlandi. 

Hetta merkir, at kundarnir mugu stovna tvær kontur í Gazprom-bankanum,  eina fyri útlendskt gjaldoyra og eina fyri rublar. 

Fýra gassfeløg í Evropa, nøvnini eru ikki upplýst, hava higartil rindað fyri gassið í rublum, skrivar Bloomberg í dag.

Tíðindastovan endurgevur keldur, sum hava tætt samband við russiska gassrisan, Gazprom.