Kringvarpið skal framleiða nógv tilfar til børn og ung

Í public service-sáttmálanum, sum arbeitt verður við í løtuni, verður ikki bara ásett, at Kringvarpið skal raðfesta gott tilfar til børn og ung, men eisini nógv tilfar til málbólkin.

Tað sigur Jenis av Rana, landsstýrismaður í mentamálum, í svari til Jóhannis Joensen, løgtingsmann.

Hann sigur, at partarnir eru samdir um, at tað er alneyðugt í eini tíð, har stóru stroymingartænasturnar varpa alt meira útlendskt tilfar, eisini til børn og ung.

Jenis av Rana sigur, at hann hevur roynt at útvega Kringvarpinum størri fígging næstu árini, men tað hevur ikki borið á mál. 

Kann ikki ávirka programmvirksemið

Kringvarpið er sjálvstøðugur, almennur stovnur, sum virkar óheftur av politisku skipanini. Landsstýrismaðurin hevur ikki ávirkan á programmvirksemið hjá stovninum, men kann sambært kringvarpslógini gera public service-sáttmála við Kringvarpið, har til ber at raðfesta ávíst virksemi.

Aðrir stovnar framleiðla barnatilfar, eitt nú Nàm og Bókadeildin hjá Lærarafelagnum.

- Men Kringvarpið er kanska tann mentanarberandi miðilin, ið røkkur longst, og tí taki eg undir við, at meira tilfar til børn verður framleitt á stovninum ella til stovnin, sigur Jenis av Rana í svarinum til Jóhannis Joensen.