Barnaváttanarlógin kemur í gildi í morgin

Í morgin, 1. juni, verður barnaváttanarlógin sett í gildi. Endamálið við lógini er at verja børn og ung ímóti kynsligum ágangi.

Tað er Det Centrale Kriminalregister, sum útflýggjar barnaváttanir. 

Sambært barnaváttanarlógini skulu landsstovnar, kommunalir stovnar, feløg, felagsskapir og onnur fáa barnaváttanir til vega, áðrenn fólk verður sett í starv, ella verður settur til ávísa uppgávu, ið ber í sær beinleiðis og regluligt samband við børn undir 15 ár. 

Serligt oyðiblað

Tá ein barnaváttan skal fáast til vega, skal arbeiðsgevari, felagsskapur og onnur, sum koma undir breiða arbeiðsgevarahugtakið í lógini, nýta serligt oyðiblað til endamálið.

Arbeiðsgevarin skal fylla oyðublaðið út. Viðkomandi starvsfólk ella umsøkjari, ið váttanin snýr seg um, skal á oyðublaðnum skrivliga geva samtykki til, at arbeiðsgevarin biður um barnaváttan um viðkomandi. Arbeiðsgevarin kann ikki heinta barnaváttan uttan samtykki.

Tá viðkomandi starvsfólk ella umsøkjari hevur skrivað undir, skal arbeiðsgevarin senda oyðiblaðið til Det Centrale Kriminalregister.

Málsviðgerartíðin hjá Det Centrale Kriminalregister er vanliga uml. 10 dagar.