Aldursmark fyri at keypa vápn verður neyvan til lóg

Amerikanska umboðsmannatingið hevur samtykt eitt uppskot um at seta 21 ára aldursmark fyri at keypa hálvautomatisk vápn í USA. 

Men hetta verður neyvan sett í gildi.

Uppskotið kom eftir hópdrápini í Buffalo í New York og í Uvalde i Texas.

Kortini er lítið sannlíkt, at uppskotið  verður til lóg, tí samráðingarnar í senatinum snúgva seg um at styrkja arbeiðið við sálarligari heilsu, trygdartiltøk við skúlar og at kanna bakgrundina hjá fólki, sum keypa vápn.

Umboðsmannatingið atkvøður um fleiri partar av endaliga lógaruppskotinum, áðrenn atkvøtt verður um allan pakkan. 

Tann parturin av uppskotinum, sum snýr seg um aldursmarkið, var samtyktur við 228 atkvøðum fyri og 199 ímóti.