Túsund flogskiparar hjá SAS ætla sær í verkfall

Umleið 1.000 flogskiparar hjá SAS boða frá verkfalli, sigur fakfelagið hjá flogskiparunum.

Samstundis sum flogskiparar í Danmark hava boðað frá verkfalli, hava flogskiparar í Noregi og Svøríki eisini gjørt tað sama.

Fara flogskipararnir í verkfall, fer tað helst at darva og ávirka summarfrítíðina hjá nógvum fólkum í Skandinavia.

Tað er óvist, um fráboðaða verkfallið fer at ávirka flúgvingina til og úr Føroyum. Regin Jakobsen, stjóri í Vága Floghavn, hevur eingi boð fingið frá SAS.

Byrjar 24. juni

Eitt verkfall skal fráboðast minst 14 dagar frammanundan, og flogskipararnir hjá SAS fara tískil í fyrsta lagi í verkfall 24. juni.

Tað er dagin fyri, at skúlarnir fáa summarfrí, men formaðurin í fakfelagnum hjá flogskiparunum vísir aftur, at tað er fyri at tarna so nógvum fólkum, sum gjørligt.

- Vit hava samráðst við SAS síðani miðskeiðis í november, hvussu sparingarnar kunnu gerast, sigur Henrik Thyregod, sambært Ritzau.

Sáttmálin hjá flogskiparunum fór úr gildi 1. apríl í ár, og tí kunnu flogskipararnir fara í verkfall, uttan at tað er í stríð við reglurnar.

Svenski staturin, sum eigur 21,8 prosent í SAS, boðaði týsdagin frá, at flogfelagið fær ikki meira pening haðani.