Størsta rentuhækking í USA síðani 1994

Amerikanski tjóðbankin hevur hækkað vegleiðandi rentuna 0,75 prosentstig, og tað er størsta hækkingin síðani í 1994, skrivar Ritzau.

Bankin sigur eini fráboðan, at rentuhækkingin er neyðug fyri at tálma inflatiónina, ella prísvøksturin.

Inflatiónin í USA var í mai gjørd upp til 8,6 prosent fyri árið.

Amerikanski tjóðbankin viðgongur, at stig ov seint eru tikin til at minka inflatiónina, og tí er neyðugt at taka álvarsligari stig alt fyri eitt.

Merkist eisini um okkara leiðir

Amerikanska rentuhækkingin fer eisini at merkjast um okkara leiðir, sigur ovasti búskaparfrøðingurin í Arbejdernes Landsbank í Danmark, Jesper Juul Borre.

Hann sigur, at donsku lántakararnir longu hava merkt, at rentan hækkar. Fasta rentan á einum láni er nú næstan fimm prosent. Um ársskiftið var rentan tvey prosent og í fjør 0,5 prosent, sigur hann.

Fyri nógv lán er talan um stóra hækking, men tað eru eisini tey, sum hava lánt við fastari rentu, og tey kunnu minka um restskuldina, sigur Jesper Juul Borre.