- Tíðindi, mentan og ítróttur
Fólkaatkvøða um skotskt sjálvstýri
Hildið verður, at skotski fyrstiráðharrin, Nicola Sturgeon, fer at leggja fram ætlanirnar fyri fólkaatkvøðu at vera í oktobermánaði næsta ár - við ongari formellari góðkenning frá bretskum ráðharrum.
Sturgeon sigur, at hon hevur demokratiska heimild til at skipa fólkaatkvøðuna, tí flokkarnir Scottish National Party og Scottish Greens hava meirilutan í skotska parlamentinum.
- Nú er stundin komin at geva fólkinum demokratiska valið, sum tey hava atkvøtt fyri, og eftir loysingina at byggja upp vælferð, størri samstarv á jøvnum føti millum Skotland og hin partin av Bretlandi, sigur Sturgeon, sambært BBC.
Men ikki øll taka undir við ætlanunum.
Formaðurin í Scottish Conservative, Douglas Ross, sigur við BBC, at hann verður ikki við í sokallaðu fólkaatkvøðuni.
Hann leggur Sturgeon undir at spæla eitt spæl, tí onnur meira týðandi mál eru fyri framman fyri landið.
Á fólkaatkvøðuni í 2014 um skotska loysing fekk nei-vongurin 55 prosent av atkvøðunum.