Møguligt SAS-verkfall rakar føroysku flogferðsluna

Tað fer eisini at raka flúgvingina til og úr Føroyum, gera flogskiparar hjá SAS álvara av at fara í verkfall.

Á midnátt fara 1.000 flogskiparar hjá skandinaviska flogfelagnum í verkfall, um tað ikki eydnast at fáa í lag ein nýggjan sáttmála áðrenn.

- Tað fer eisini at raka Føroyaflúgvingina, tí øll flúgving hjá okkum verður darvað, sigur Alexandra Lindgren Kaoujk, kunningarleiðari, við útvarpið.

Umleið annarhvør flogskipari hjá skandinaviska flogfelagnum fer ikki til arbeiðis, um verkfall verður - heldur ikki teir, ið flúgva til og úr Føroyum.

- Tí slepst ikki undan, at Føroyaflúgvingin hjá okkum eisini verður ávirkað, sigur kunningarleiðarin hjá SAS, við útvarpið.

Júst, hvussu og nær verkfallið fer at ávirka flúgvingina hjá skandinaviska flogfelagnum higar, veit hon ikki at siga í løtuni.

Í fleiri vikur hava SAS og flogskipararnir samráðst um nýggjan sáttmála fyri tann, ið fór úr gildi 1. apríl.

Teir umleið 1.000 flogskipararnir hjá SAS, ið ætlandi fara í verkfall, eru í starvi í Danmark, Norra og Svøríki.