Svimjihøllin í Runavík aftur á skrá

Hóskvøldið skal Runavíkar Býráð taka støðu til størstu íløguna, sum kommunan hevur gjørt. Talan er um at byggja eina svimjihøll í Runavík, sum fer at kosta 165 milliónir krónur.

Ætlanin er at gera ein arbeiðstakarasáttmála við Kanjon um at gera arbeiðið, og tað er hesin sáttmáli, sum skal viðgerast á býráðsfundi hóskvøldið. 

Tann 17. januar skrivaðu partarnir undir partalagsavtalu. Kanjon læt fyribils boð inn miðjan apríl. Síðan er boðið gjøgnumgingið av ráðgevum, sum mettu um prísin, og um sparingarátøk kundu gerast.

Kostar kommununi 165 milliónir 

Tað arbeiðið er nú liðugt, og Kanjon sigur seg kunna gera høvuðsarbeiðstakarasáttmála fyri 123 milliónir krónur.

Tá alt er tikið við, millumbygningar, príshækkingar, jarðhiti og mvg, verður prísurin fyri svimjihøllina 165 milliónir krónur.

5 milliónir krónur kunnu sparast, um oljufýring verður sett upp ístaðin fyri jarðhita. Mett verður at íløgan fyri jarðhita verður spard aftur eftir 5-8 árum.

Talan verður um eina framkomna svimjihøll. Har verður 25 metra hylur við 8 geilum og øðrum útbúnaði til bæði yngri og eldri.

Mentanardeildin mælir til at gera sáttmála við Kanjon um høvuðsarbeiðstøku. 

Fíggjarleiðarin vísir á, at verkætlanin á 165 mió. kann fíggjast við at taka lán í ár, næsta ár og í 2024 upp á 30, 35 og 20 milliónir krónur, umframt kunnu brúkast ársfíggjaðar íløgur upp á 40 milliónir krónur í 2023 og í 2024.

Ikki full semja í kommununi

Tað er ikki full semja í kommununi um ætlanina. Ítróttarnevndin og tøkni- og umhvørvisnevndin hava viðgjørt verkætlanina, og tey mæla til at leggja málið fyri býráðið til støðutakan.  

Byggi- og býarskipanarnevndin mælir við einari atkvøðu til at taka undir við tilmælinum frá mentanardeildini, tvær atkvøður eru blankar, meðan ein er fyri at leggja málið fyri býráðið til støðutakan. 

Fíggjarnevndin mælir til, við 4 atkvøðum fyri og einari blankari, at taka undir við tilmælinum frá mentanardeildini um at gera sáttmála við Kanjon um høvuðsarbeiðstøku. 

Samstundis skal býráðið taka støðu til eina umsókn frá BBP arkitektum um byggiloyvi til svimjihøllina, sum skal byggjast ímillum Apotekið og Bylgjuna.

Tekniska nevnd í býráðum mælir til at góðkenna byggiloyvið, og tað sama ger byggi- og býarskipanarnevndin.