Húsarhaldsskúlin verður ikki fluttur

Staðsetingin av Húsarhaldsskúlanum á Biskupstorgi í Klaksvík verður ikki broytt. Hetta sigur borgarstjórin í Klaksvík, eftir at málið hevur verið uppi og vent í býráðnum.

- Tað var breið semja um, at vit ikki viðgera staðsetingina aftur. Býráðið hevur samtykt, at Húsarhaldsskúlin skal liggja á Biskupstorgi, avtala við stýrið fyri Húsarhaldsskúlan bleiv gjørd um leigu av økinum, og tann sáttmálin er undirskrivaður og tinglisin, sigur Karl Johansen. 

Í 2019 ynskti ein býráðslimur at broyta staðsetingina av Húsarhaldsskúlanum, og tá viðgjørdi býráðið eina møguliga flyting. 

- Uppskotið um at flyta Húsarhaldsskúlan bleiv viðgjørt á sinni. Tá atkvøddi ein býráðslimur fyri uppskotinum, meðan 10 býráðslimir atkvøddi móti. Síðani viðgjørdi býráðssamgongan málið, minnilutin varð tikin upp á ráð, og tað var rættiliga breið semja um, at staðsetingin ikki verður viðgjørd aftur í býráðnum, sigur Karl Johansen, borgarstjóri í Klaksvík.

Húsarhaldsskúli Føroya Føroya Húsarhaldsskúli

Caption: 

Ætlanin er, at Føroya Húsarhaldsskúli skal ligga við Biskupstorg í Klaksvík.

1.400 mótmælisskriv broyta ikki staðsetingina 

14. juni í ár handaði Archibald Black býráðnum 1.400 undirskriftir, har mótmælt var um staðsetingina av Húsarhaldsskúlanum við Biskupstorg í Klaksvík, soleiðis at Biskupsstøð verður varðveitt sum eitt søguligt varðveitingarøki.

Men hetta hevur ikki ávirkað borgarstjóran og býrráðssamgonguna.

- Stigtakarin greiddi frá, at av teimum 1.400 undirskriftunum vóru 1.000 búsitandi í Klaksvík. So tað er ein góður fimtapartur av íbúgvunum í Klaksvík. Merkir tað so, at 4.000 íbúgvar møguliga eru fyri - tað veit eg ikki. Men semja er í býráðnum, og staðsetingin verður ikki broytt, sigur ein avgjørdur borgarstjóri. 

Sambært borgarstjóranum í Klaksvík, verður útsýnið til Biskupsgarðin ikki skert, hóast Húsarhaldsskúlin verður bygdur á ætlaðu staðsetingina. 

Tað er sjálvsognarstovnurin, Húsarhaldsskúli Føroya, sum stendur fyri byggingini, og sum hevur fingið stuðul frá býráðnum og landinum. Tí veit borgarstjórin í Klaksvík heldur ikki neyvt at siga, nær farið verður í gongd við at byggja nýggja Húsarhaldsskúlan.