- Tíðindi, mentan og ítróttur
U20: Føroyar vunnu á Danmark
Føroysk hondbólts- og ítróttasøga var skrivað á middegi í dag, tá Føroyar leiktu fyrsta dystin í einum EM-endaspæli.
Fyrsti dysturin var móti Danmark, sum verður mett sum eitt sera sterkt lið í kappingini.
Føroyar vunnu dystin 33-32.
Pauli Jacobsen í føroyska málinum stóð sera væl, og hann var eisini kosin dagsins spælari hjá Føroyum.
16 lið eru við í kappingini, og mett verður, at Føroyar eru í bólki við nøkrum av sterkastu liðunum. Fyri uttan Føroyar og Danmark, eru eisini Slovenia og Ungarn í bólkinum.
Tá hesin sami aldursbólkurin spældi U18-EM, gjørdist Slovenia nummar fýra, Danmark nummar fimm og Ungarn nummar níggju.
Í morgin spæla Føroyar móti Slovenia. Tað er eisini klokkan 12, og Kringvarpið byrjar at senda klokkan 11.50.