Suðuroyggin tódnar

Seinastu 35 árini er fólkatalið í Suðuroynni minkað við 20 prosentum, samstundis sum fólkatalið í Føroyum er vaksið við sløkum 19 prosentum. 

Suðuroyggin er tódnað við 1.200 fólkum, svarandi til, at nærum øll Vágs bygd var burtur. Og hetta í eini tíð, har samlaða fólkatalið í Føroyum er økt við 8.300 fólkum.

Tað átti fingið nakrar alarmklokkur at ringt í Løgtinginum, skrivar Fróði Mortensen, kommunustjóri í Tvøroyrar kommunu, í einum lesarabrævi á Suðurrás.fo fyri nøkrum døgum síðani.

Fróði Mortensen, sum ikki vil gera samrøðu við Kringvarpið um málið, spyr í lesarabrævinum, hvørjar Føroyar, vit ynskja? 

Hann vísir á, at vøkstur er so at siga í øllum økjum, burtursæð frá Suðuroyar og Sandoyar økinum, og hann vónar, at komandi Sandoyartunnil fer at venda gongdini í Sandoynni.

At landsstýrið dittar sær at bjóða Herjólf III sum avloysaraskip fyri Smyril á Suðuroyarleiðini, er at meta sum hán móti suðuroyingum, og tað er eitt tekin um onga virðing og vantandi vitan um tørvin hjá ferðafólki og farmi á Suðuroyarleiðini. Hetta eigur undir ongum umstøðum at góðtakast, heldur kommunustjórin.

- Tað er ongin ivi um, at Suðuroyartunnilin má fáa allar hægstu raðfesting á komandi fíggjarætlan hjá Løgtinginum, um niðurbræðingin av Suðuroynni skal steðga. Hetta hóast tað ber í sær, at aðrar almennar verkætlanir mugu útsetast, skrivar Fróði Mortensen og leggur afturat, at hetta hava vit krav upp á sum suðuroyingar og javnbjóðis føroyingar.