Útvístur í fimm ár fyri rúsevnissmugling

Ein 26 ára gamal maður úr Rumenia var mikudagin útvístur fyri at smugla rúsevni til Føroya.

Maðurin varð tikin í tolleftirlitinum í Vágum, tá ið hann týsdagin royndi at smugla umleið tvey kilo av hassji í konservesdósum.

Rumenski maðurin játtaði seg sekan, og tí kundi Føroya Rættur longu mikudagin avgreiða málið við einum straksdómi.

Maðurin var dømdur fýra mánaðir treytaleysa fongsulsrevsing, sigur løgreglan í tíðindaskrivi mikudagin.

Ákæruvaldið kravdi eisini, at 26 ára gamli maðurin skal útvísast úr Føroyum í fimm ár. Hesum tók Føroya Rættur undir við.

Harafturat kravdi ákæruvaldið, at hann skuldi fongslast eftir dómin, tí hann er útlendingur, og at hann skal sita, til útvísingin kann fremjast.

Eisini hesum tók Føroya Rættur undir við.

Hetta er tann triði straksdómurin eftir einum mánað.