London fer eftir fjórða OL

Tíggju ár eftir at London var vertur fyri Olympisku Leikunum, fer býurin aftur eftir vertsleiklutinum, skrivar Sky News.

Tað sigur borgarstjórin, Sadiq Khan, ið heldur, at býurin er førur fyri at hýsa leikunum, samstundis sum hugsað eisini verður um umhvørvið.

– Vit skulu syrgja fyri, at leikirnir verða "grønir", og vit arbeiða við einari ætlan um at skipa fyri teimum umhvørvisvinarligastu leikunum í søguni, sigur borgarstjórin.

Sadiq Khan heldur, at London longu hevur allar hentleikar, til at fáa Olympisku Leikirnar til býin. Tískil verður ikki neyðugt, at byggja nakað nýtt.

Ikki neyðugt at byggja nýtt

– Okkum nýtist ikki at byggja nýtt og útleiða CO2, tí vit hava longu alt her frammanundan, sigur borgarstjórin í London, sambært tíðindastovuni, Ritzau.

London hevur fyrr verið vertur fyri Olympisku Leikunum tríggjar ferðir - í 2012, 1948 og 1908 - og tað verður sostatt fjórðu ferð, býurin kann hýsa leikunum.

Fyri fáum árum síðani varð ikki so nógv tosað um umhvørvið og veðurlagið. Tí hevur tað verið siður, at velja teir býir og lond, ið kundu byggja nýtt og stórt.

Australski býurin, Brisbane, skal hýsa leikunum í 2032, og tí kann tað í fyrsta lagi koma uppá tal, at London aftur hýsir Olympisku Leikunum í 2036.