Inflatiónin í Evropa er størri enn í Føroyum

Ógvusligi vøksturin í gass- og elprísunum hevur størri ávirkan á gerandisdagin á evropeiska meginlandinum enn í Føroyum, skrivar Vinnuhúsið.

Vøksturin í føroyska brúkaraprístalinum var 7,3 prosent í øðrum ársfjórðingi í ár, samanborið við sama ársfjórðing í fjør. Men í sama tíðarskeiði var inflatiónin í teimum 27 ES-londunum 9,6 prosent, ella 2,3 prosent størri enn í Føroyum.

Prísvøksturin hevur bara einaferð verið størri seinastu 20 árini, og tað var triðja ársfjórðing 2008, tá árligi vøksturin í brúkaraprísunum var 7,9 prosent.

Óbroyttir SEV-prísir

Størsta orsøkin til, at vøksturin í brúkaraprístalinum er minni í Føroyum enn í Danmark og hinum ES-londunum, er helst ógvusligi vøksturin í gass- og elprísunum á evropeiska megin­landi­num hesar seinastu mánaðirnar. Hetta hevur havt væl størri ávirkan á gerandisdagin í Danmark og ES enn í Føroyum. 

Føroysk húsarhald brúka so at siga ikki gass, og elprísirnir frá SEV hava verið óbroyttir leingi, skrivar Vinnuhúsið.