Útnorðurráðið viðger støðuna hjá teimum ungu

Ungdómurin var á skránni fyrsta dagin hjá Útnorðurráðnum, sum hevur sín 38. ársfund í Nuuk í løtuni.

Útnorðurráðið mælir landsstýrunum í Grønlandi og í Føroyum og stjórnini í Íslandi til, at tey landsstýrisfólkini og teir ráðharrar, sum varða av teimum ungu, hittast næsta ár at tosa um støðuna hjá teimum ungu í teimum trimum londunum.

Endamálið er at finna felags avbjóðingar og tosa um felags loysnir.

Ársfundurin byrjaði í gjár.

Tá hildu Jenis av Rana, landsstýrismaður í uttanríkismálum, og Vivian Motzfeldt, sum hevur uttanríkismálini í grønlendska landsstýrinum, røðu um samstarv við grannarnar hjá Útnorðri.