Putin fer ikki at fylgja Gorbatjov

Jarðarferðin Mikhail Gorbatjov leygardagin verður uttan russiska forsetan, Vladimir Putin. 

Gorbatjov, sum gjørdist 91 ár, stjórnaði Sovjetsamveldinum frá 1985 til 91, og gjørdist sostatt seinasti leiðarin í Sovjetsamveldinum, áðrenn stórveldið fór í upploysn.

Hann fekk í 1990 Nobelfriðarheiðurslønina fyri leiklut sín at enda kalda kríggið millum eystur og vestur. Somuleiðis royndi hann at skapa eitt meira opið og demokratiskt Sovjetsamveldi, men tað endaði við upploysn.

Sambært Reuters fer russiski forsetin, Vladimir Putin, ikki at fylgja Gorbatjov leygardagin. Úr Kreml verður sagt, at tíðarætlanin hjá Putin loyvir ikki hesum. 

Talsmaðurin hjá russiska forsetanum, Dimitri Peskov, sigur, at Putin í staðin vísti sína virðing fyri Gorbatjov við at leggja ein krans við Sentrasjúkrahúsið i Moskva, har Gorbatjov doyði týsdagin.