Heilsufrøðiliga starvsstovan steðgar gullvinnandi føroyskum vodka

"Vit hava júst fingið boð frá Heilsufrøðiligu starvsstovuni (HSF), har tey biðja okkum afturhalda okkara nýggja North Atlantic Subsea Vodka. Trupulleikin er, sambært HSF, at vatnið ikki kemur frá løggildum tappistaði."

Soleiðis skrivar føroyska brennivínsvirkið Faer Isles Distillery á sínari Facebook-síðu. 

Faer Isles Distillery hevur annars lýst við, at teirra vodka, sum er bryggjað við vatni úr Sandoyartunlinum, skuldi vera til sølu í Rúsuni í dag klokkan 10. 

Leki gav møguleikan

Meðan Sandoyartunnilin varð boraður, varð ein leki funnin, har feskt vatn rann úr. Tað vísti seg, at stórar nøgdir av vatni støðugt runnu úr lekanum í fleiri mánaðir, og tað gav møguleikan til at framleiða hetta sermerkta vodkað. 

"Vatngóðskan er kannað av Thetis og er sera góð. Vit hildu hetta vera nóg mikið. Men sambært HFS (Heilsufrøðiligu starvstovuni) má vatn til matvøru einans koma frá løggildum tappistaði," skrivar Faer Isles Distillery. 

Gullheiðursløn

Subsea Vodka, sum vøran eitur, bleiv beinanvegin sent inn til eina av fremstu altjóða kappingunum fyri vodka, The Vodka Masters. Kappingin hevur nakrar av bestu serfrøðingunum í heiminum í dómsnevndini.

1. september bleiv almannakunngjørt, at Subsea Vodka hevði vunnið gull í flokkinum Super Premium.

Men nú hevur Heilsufrøðiliga starsstovan so noktað Faer Isles Distillery at selja hetta gullvinnandi vodkað. 

"Vit fara at gera alt, sum vit kunnu, fyri at loyvi at selja vøruna kemur upp á pláss sum skjótast. Vit eru sera hørm um støðuna yvir fyri teimum, sum til fánýtis ynsktu at keypa vøruna í dag," staðfesta framleiðararnir.