Stoltenberg: Russland er undir trýsti

NATO-aðalskrivarin, Jens Stoltenberg, sigur, at Russland er undir trýsti, nú fráboðanir eru um, at russiski herurin tekur seg aftur úr økinum við Kherson har suðuri í Ukraina.

- Tað er greitt, at Russland er undir hørðum trýsti, og um teir fara úr Kherson, verður tað enn ein sigur fyri Ukraina, segði Jens Stoltenberg fyrr í dag á tíðindafundi, eftir at hann hevði hitt italska forsætisráðharran, Giorgiu Meloni.

Eisini amerikanski forsetin, Joe Biden, sigur sambært The Guardian, at Russland hevur álvarsligar trupulleikar í Ukraina. Hann vísir á, at tá russiski herurin noyðist at fara úr økjum, sum ætlanin annars er at leggja undir seg, má tað merkja, at herurin hevur stórar avbjóðingar.

Men Mykhailo Podolyak, sum er fremsti ráðgevi hjá ukrainska forsetanum, Volodymyr Zelenskyj, er meira varin. Hann skrivar á Twitter, at "gerðir tosa harðari enn orð."

- Vit síggja ongi tekin um, at Russland fer úr Kherson uttan stríð. Nógvir russarar eru enn í býnum, og russiskar herdeildir eru enn í økinum, skrivar Podolyak.