Klaksvíkar kommuna ger íløgur fyri 52 mió. kr.

Klaksvíkar kommuna ætlar at brúka 51,7 mió. kr. til íløgur næsta ár. 

Tær størstu eru útstykkingin á Fossum, sum 10 mió. kr. fara til, meðan 8,5 mió. kr. eru til at víðka Norðhavnina.

Í fíggjarætlanini hjá Klaksvík kommunu fyri 2023 er roknað við 328,8 mió. kr. í inntøkum, ið er 6,1 prosent meira enn í ár.

Rakstarútreiðslurnar eru  slakar 255 milliónir, 4,9 prosent størri enn í ár.

Tá peningur er settur av til íløgur og avdráttir, er avlopið 78.000 kr.

Skattaprosentið verður tað sama sum í ár, 20,75, og barnafrádrátturin er eisini óbroytur, 5.500 kr.