Arbeiðsloysið er framvegis søguliga lítið

Arbeiðsloysið var eisini 0,7 prosent í november í fjør, bæði hjá kvinnum og hjá monnum.

Tað er søguliga lítið, sigur Hagstovan.

Arbeiðsloysið svarar til 220 fulltíðararbeiðsleys.

Arbeiðsloysið var minst í Vágum og í Eysturoynni og størst í Sandoynni. Í dag eru 186 skrásett hjá ALS at vera arbeiðsleys.

325 fáa pengar úr fiskivirkisskipanini. Í henni eru 1197 fólk. Nøkur arbeiðsleys fáa pengar frá Almannaverkinum.

250 fulltíðararbeiðsleys

Í november í 2021 var arbeiðsloysið 0,8 prosent, 250 fulltíðararbeiðsleys. Ein fulltíðararbeiðsleysur er fólk, sum er arbeiðsleyst allan mánaðin. 

Tað merkir, at eru tvey fólk arbeiðsleys ein hálvan mánað hvørt, telja bæði samanlagt sum ein fulltíðararbeiðsleysur. Í november vóru 285 fólk arbeiðsleys.

Arbeiðsloysið er minst millum tey 45 til 54 ára gomlu og størst millum 25 til 34 ára.

13 prosent eru langtíðararbeiðsleys.Tey høvdu verið arbeiðsleys í meira enn eitt ár. Í november í fjør vóru 16 prosent langtíðararbeiðsleys.