Óstøðug vatnveiting í Hósvík

Fólk í Hósvík hava einki vatn havt fleiri ferðir á jólum og eftir jól.

Sunda kommuna skrivar nú á heimasíðuni hjá sær, at arbeiðið at fáa vatnbrunnarnar í Hósvík tiknar í brúk aftur fyri ársskiftið bar ikki á mál. 

Kommunan sigur seg vera sera harma um støðuna, bæði tí kunning hevur vantað, og at arbeiðið við vatnbrunnunum hevur gingist so illa. 

Fyrsta stigið er nú at fáa sett brunnarnar til, so vatngoymslan er størri, og hósvíkingar ikki missa vatnið, um proppur kemur í vatninntakið.

Broyta inntakið

Annað stig er, at vatninntakið verður flutt og broytt, so hendan støðan við at proppur kemur í, ikki kemur aftur.

Hetta arbeiðið verður gjørt, tá tað er turt, í vár ella í summar.

Triðja stigið verður at fáa eitt eyka inntak við pumpuskipan til ovastu húsini og komandi útstykkingar. 

Enn fáa hósvíkingar vatn úr gamla vatnbrunninum.