Føroyskt toymi fer til Svøríkis at framleiða HM í hondbólti

HM í hondbólti er fyri framman. Ein partur av dystunum verður í Póllandi og ein partur í Svøríki. Henrik Saabye TV Productions framleiðir dystirnar og hevur aftur hesa ferð biðið fleiri starvsfólk úr Kringvarpinum um at vera við í framleiðsluni í Svøríki.

Teir eru Bjarnheðin í Hoyvík og Hallur E. Thomsen, sum eru í føstum starvi í Kringvarpinum, og Rúni Friis Kjær, Gilli Brend í Hoyvík og Andri Gerðisá, sum javnan gera fríyrkisarbeiði fyri Kringvarpið.

Hetta er fjórðu ferð, at Bjarnheðin í Hoyvík er við í ítróttaframleiðslu hjá Henrik Saabye og triðju ferð hjá Halli E. Thomsen.
 

Framleiðslutoymi í heimsflokki

Henrik Saabye er ein av royndastu ítróttaframleiðarum í heiminum. Hann hevur m.a. framleitt fleiri HM-finalur, EM-finalur og OL-finalur í hondbólti.

"Hetta er ein frálíkur møguleiki hjá okkara starvsfólkum at útvega sær nýggjar tøkniligar førleikar og arbeiðsroyndir, sum vit kunnu gagnnýta. Eg ivist ikki í, at vit fara at síggja hetta aftur, tá vit framleiða landsdystir í Kringvarpinum", sigur kringvarpsstjórin, Ivan Hentze Niclasen.