Vinnukundar í Føroyum eru væl fyri

Kredittvirðið hjá vinnukundum í føroyskum peningastovnum er batnað seinnu árini, sigur danski tjóðbankin

Tjóðbankin sigur í nýggjari frágreiðing, at føroysku peningastovnarnir eru betur bjálvaðir, og tað ger, at teir eru førir fyri at taka ímóti tapum í framtíðini.

Mynd: Bjarni Árting Rubeksen

Kári Mikkelsen

11.01.2023 - 14:09

Vinnukundarnir hjá føroysku peningastovnunum standa seg yvirskipað betur enn teir í donskum peningstovnum, har talið av neyðlíðandi vinnulánum er størri enn í Føroyum.

Hetta skrivar danski tjóðbankin í búskaparfrágreiðing fyri Føroyar, sum kom mánadagin.

Sostatt eru færri neyðlíðandi lán og skyldur hjá vinnukundum í føroyskum bankum enn í donskum.

Tá hugt verður at niðurskrivingum og afturføringum av millumverandi við vinnukundar síðani 2016, sæst sama myndin, at støðan er betri í Føroyum.

Kredittvirðið hjá vinnukundum í føroyskum peningastovnum er sostatt alsamt batnað seinnu árini.

Eisini eru føroyskir peningastovnar vorðnir betur bjálvaðir fíggjarliga seinnu árini. Tað ger teir betri førar fyri at standa ímóti tapum í framtíðini.