Meiri peningur til frítíðartilboð til børn

Sirið Stenberg, landsstýriskvinna, heldur fast í raðfestingini hjá undanfarnu samgongu, sum setti av fleiri pengar til frítíðartilboð til børn, so sleppast kann undan bíðilistum.

Í fíggjarlógaruppskotinum hjá undanfarna landsstýri var ætlanin at hækka játtanina til frítíðartilboð. 

Sirið Stenberg sigur, at hon heldur fast í hesi raðfesting í fíggjarlógaruppskotinum, sum verður lagt fyri løgtingið í næstum.

Millum annað verður peningur játtaður til ein stovn í Suðuroy. 

Landsstýriskvinnan hevur svarað einum fyrispurningi frá Sólvit Emilsson Nolsø, løgtingsmanni, sum spurdi um umlættingar- og frítíðartilboð.  

Landstýrið 2022/23, Sirið Stenberg

Sirið Stenberg, landsstýriskvinna, hevur svarað fyrispurningi um umlættingar- og frítíðartilboð. (Mynd: Bjarni Árting Rubeksen)

Virksemi umlagt

Sirið Stenberg svarar, at Almannaverkið hevur umlagt virksemi sítt, sum ger, at fleiri børn kunnu fáa frítíðartilboð.

Men avbjóðingar eru, bæði viðvíkandi hølum og starvsfólkum.

Sirið Stenberg sigur, at hon saman við avvarðandi pørtum er farin undir at gera eina langtíðarætlan, sum byggir víðari á arbeiðið, sum undanfarna samgonga setti í verk. 

Løgtingsvalið 2022, flokkarnir í Norðurlandahúsinum Sólvit Nolsøe

Sólvit E. Nolsø, løgtingsmaður, hevur spurt Sirið Stenberg, landsstýriskvinnu. (Mynd: Bjarni Árting Rubeksen)

Ein stovnur um árið

Ætlanin er at gera eina ætlan fyri komandi tíggju árini. Miðað verður eftir at byggja í minsta lagi ein stovn um árið.

Í løtuni eru tríggjar byggiverkætlanir í gongd í miðstaðarøkinum.

Tveir av hesum stovnum skulu lata upp í ár, og tann triði væntandi um ársskiftið.

Og Almannaverkið hevur gjørt leiguavtalu um ein stovn í Klaksvík, sum letur upp í ár.