Mentanarvirðislønir landsins beinleiðis í sjónvarpinum mikukvøldið

Aftur í ár verða Mentanarvirðislønir landsins latnar. Nakað seinkaðar orsakað av valinum, ið var í heyst, og umskipanina av ymsu ráðunum, eitt nú Mentamálaráðnum.

Handanirnar av virðislønum og heiðursgávu landsins verða mikukvøldið 22. februar kl. 19 til á leið 20.30. Í ár verður tiltakið hildið í Hátúni á Musikkskúlanum í Havn.

Kringvarpið hevur í mong ár sent frá hesi hátíðarløtu, fyrst var tað útvarpað beinleiðis, síðani var eisini stroymt í nøkur ár, og seinnu árini hevur sjónvarpið eisini sent beinleiðis.

Ein filmað kvøldseta við tónleiki, røðum og fegnum virðislønamóttakarum.

Ætlanin er m.a. at fáa onkrar av framúr dugnaligu og vælútbúnu tónleikalærarunum á Musikkskúlanum í Hátúni at framføra.

Páll Danielsen verður vertur.