Bústaðir: Strika kravið um aðrar íleggjarar

Bústaðir skulu nú sleppa undan kravinum um, at allar verkætlanir skulu fremjast saman við øðrum íleggjarum.

Umhvørvismálaráðið hevur gjørt uppskot um broyting í lógini um Húsalánsgrunnin.

Uppskotið er um at strika kravið um fígging frá øðrum íleggjarum í sambandi við bústaðabygging.

Hetta kravið tarnar Bústøðum í at útvega bústaðir, sigur Umhvørvismálaráðið. 

Uppskotið er sent til hoyringar. Freistin er til 14.mars.

Bústaðir, íbúðir, íbúðir hjá Bústøðum

Húsaleigan verður størri, enn hon hevði verið, um Bústaðir einsamallir fíggjaðurog róku bústaðirnar uttan vinning, sigur Umhvørvismálaráðið.

Brúka orku at finna íleggjarar

Kravið um samstarvið við aðrar íleggjarar ger, at Bústaðir skulu brúka orku til at finna áhugaðar íleggjarar og gera samstarvsavtalur við teir.

Hesir íleggjarar hava sjálvandi fyrst og fremst fíggjarligan áhuga í at vera við í verkætlanum saman við Bústøðum.

Hetta er neyðturviliga ikki sambæriligt við endamálið hjá Bústøðum, sum er at útvega eitt fjølbroytt útboð av bústøðum kring landið, sigur Umhvørvismálaráðið.

Kravið um samstarv ger, at Bústaðir skulu rokna sær fíggjarligt avkast av bústøðum, svarandi til avkastkravið hjá hinum íleggjarunum. 

Tí verður húsaleigan størri enn hon hevði verið, um Bústaðir einsamallir fíggjaðu og róku bústaðirnar uttan vinning, sigur Umhvørvismálaráðið.

Løgtingið 2023, Ingilín D. Strøm

Ingilín D. Strøm er landsstýriskvinna í bústaðarmálum. (Mynd: Bjarni Árting Rubeksen)

Møguleiki at samstarva við aðrar

Tó at kravið um samstarv við aðrar íleggjarar verður tikið burtur, varðveita Bústaðir kortini møguleikan at fara í samstarv við aðrar íleggjarar. 

Treytin um, at Bústaðir tá virka eftir somu treytum sum hinir íleggjararnir verður eisini varðveitt.

Heimildin hjá landsstýrisfólkinum at geva undantak frá kravinum um aðrar íleggjarar verður strikað, nú kravið verður strikað í lógini.