O, móðurlandið!: Nýggj sendirøð í sjónvarpinum

Hóskvøldið eftir Dag og viku byrjar nýggj sendirøð í sjónvarpinum, sum ber heitið "O, móðurlandið".

Ein sendirøð, har ljós verður varpað á støðu okkara í danska ríkinum.

To be or not to be

Vit fata okkum sum egin, ikki donsk - og tó. Vit eru bæði - ella kanska hvørki? Vit ráða okkum sjálvum, men kortini ikki heilt.  

Búskaparliga hevur framburðurin síðan aldamótið verið so stórur, at Føroyar teljast millum ríkastu samfeløgini í heiminum í dag.  

Kortini tykist spurningurin um at ráða sær sjálvum ikki so viðkomandi longur, og spurningurin hevur ikki verið frammi sum eitt nevnivert tema á seinastu løgtingsvalunum.

Tvørturímóti er fatanin av okkum sjálvum sum samrunnin minniluti í danska eindarríkinum kanska sterkari nú enn fyrr. 

O, móðurlandið

Seks partar eru í alt í nýggju sendirøðini, ið ber heitið "O, móðurlandið".  Farið verður víða um í einari breiðari lýsing av evninum.

Nýggjar samrøður eru gjørdar við fleiri enn fjøruti fólk, hartil er fitt av eldri tilfari útvegað bæði úr føroyskum og donskum søvnum.

Í fyrsta partinum verður kjølurin strektur frá landnámi til fólkaatkvøðuna í 1946.

Suni Merkistein og Jógvan Eli Dam leggja til rættis. Tríggir partar verða sendir fyri páskir, og hinir tríggir eftir páskir.

Í videobrotinum niðanfyri kanst tú síggja brellbita um fyrsta partin, sum verður í sjónvarpinum hóskvøldið eftir Dag og viku.