Nýrafelagið: Dialysusjúklingar gíslar í lønartrætu

Nýrafelagið sigur seg vera skelkað av at frætta, at dialysusjúklingar í Suðuroy framvegis mugu ferðast til Landssjúkrahúsið til dialysu, meðan dialysan á Suðuroyar sjúkrahúsi stendur óvirkin, vegna ósemju um lønarískoyti.

Sambært Felagnum føroyskir sjúkrarøktarfrøðingar er trupulleikin, at upplæring skal skipast aftrat vanligu setanaravtaluni, og tað ber bara til, um starvsfólkini góðtaka hetta. Tað gera sjúkrarøktarfrøðingarnir ikki.

Nýrafelagið krevur, at ein loysn verður funnin beinanvegin, so dialysan í Suðuroy verður tikin í brúk sum skjótast.

Felagið heldur tað vera skomm, at sjúklingarnir eru gíslar í lønartrætu ella vánaligari ráðlegging, og heitir á viðkomandi myndugleikar um at gera skjótt av og loysa trupulleikan til frama fyri dialysusjúklingarnar.