Bátaeigarar varðveita atgongd til fjøruna

Tvøroyrar býráð samtykti einmælt í gjárkvøldið at broyta byggisamtyktina, so partur av fjøruni verður varðveittur, so neystaeigarar framhaldandi fáa atkomu til fjøruna og kunna brúka 
bátadráttin.

Býráðið viðgjørdi á eykafundi í gjárkvøldið ætlanina hjá Varðanum Pelagic at byggja verksmiðju á Tvøroyri.

Uppskotið um at broyta byggisamtyktina kom úr teknisku deild.

Partshoyring

Býráðið samtykti eisini einmælt uppskot frá borgarstjóranum um partshoyring, áðrenn býráðið endaliga viðger byggiloyvið til Varðin Pelagic. 

Almenn hoyring skal vera um árins- og umhvørviskanningar, áðrenn Umhvørvisstovan kann geva verkætlanini hjá Varðanum Pelagic umhvørvisgóðkenning.

Tekniska deild hjá býráðnum á Tvøroyri heldur annars ikki, at nakað av teimum trimum hoyringarsvarunum hava beinleiðis viðmerkingar ella eru broytinguppskot um ætlanina at byggja goymslubrunnar, sum eru í mesta lagi 20 metrar høgir, og skorsteinar, sum eru í mesta lagi 60 metrar høgir.

Men býráðið tók til eftirtektar hoyringarsvarið frá neystaeigarum um at varðveita fjøruna.